العدان او العدام

العدان وماأدراك مالعدان

اللي مايعرف العدان اهو مستشفى بمحافظة الاحمدي
يعني تخيلوا كل هالمناطق على مستشفى واحد
المهم ادخل بالموضوع امس زوجة اخوي راحت لمستشفى خاص فقالوا لها
لا الحاله صعبه واذا تبين نسوي عمليه بس على مسؤوليتج
اهي حامل وخلصت 9اشهر بس ماولدت المهم قالوا لها روحي للمستشفى
الحكومي اللي بطاقتكم عليه طبعا من سوء الحظ هو العدان هذا كان الساعه3 العصر
رحت انا وياها واخوي ومسكينه توها بكر اول حمال لها واخوي موعارف يتصرف
المهم دخلنا عند طواريء الحوامل والولاده ياسلام سلم على المعامله ولافندق خمس نجوم طل بعيني فندق
والمستشفى حتى الاضاءه فيه خربانه والوصخ على الارض
نجي الحين على المعامله الله واكبر البوز شبرين والنفس خايسه والممرضات كأنه مستشفى ابوهم
لا كله كوم ولاالدكتوره السيلانيه ماترد على احد طبعا تهاوشت معاها رطنت عليها بالانجليزي
وبعدها دعيت عليها دعوه بالبدوي يتروالي بعدها راح تتحرول
المهم السيلانية بنت السيلانية نقعتنا من الساعه 3 العصر للساعه 6 المغرب تعرفون خدمه سريعه وكان قدامنا 30 حاله الله اكبر وحالات عادية بعكس زوجة اخوي اللي لازم يولدونها غصب لأنها طافت 9 اشهر
المهم المسخره الاكبر كل شوي اشوفهم يزرقون كم مريضه وطبعا كلهم هنديات او سيلانيات
بدون رقم وبدون شيء يلعن ابو الواسطات حتى الهنود عندهم واسطات طبعا رديت دشيت على السيلانية اللي هي الدكتوره ورديت ازفها بالانجليزي وطبعا حاشها طشار من دعوات جدتي الله يرحمها
اخر شيء تسنعوا وقالوا ماما لازم تخطيط عشان بيبي طيب نو بروبلم تسوي تخطيط
دخلت غرفة التخطيط وانا طلعت اكلم اخوي رجعت ابي اعرف وينها دخلت غرفة التخطيط ياربي سراير بس كل اللي مسدحين سيلانيات زوجة اخوي وين
اكلم الممرضة قالت ماما انتي اطلع لازم دور مافيه تخطيط قلت لها ياهبله شايفتني حامل انا اسال عن المريضه فلانه وينها اتخيلوا المصيبه وين حاطين جهاز التخطيط الثاني في المخزن حسافه ماخلتني اصور
حاطين سرير بمخزن صغير وجهاز التخطيط ويالله انحشرت ودخلت
المهم طلعت من التخطيط بعد فتره ابشركم وقالت الممرضة ماما ادخلي عند دكتوره هذا لازم دخول عشان اولد الحين
قلت ابشري على ذا الخشم هذا اللي انا ابيه من الساعه 3 دخلت على السيلانية بنت السيلانية
الساعه 7 بالضبط اول ماطلعنا من التخطيط ردت علي بنفس خايسه انا شنو يقول انطري دور
ايا بنت ال ايه المهم نطرنا شسوي بس طبعا عقب ماعطيتها كم دعوه يقطعون الخلف
دخلنا الساعه 8 فحصتها قالت انتي لازم ادخل بسرعه عشان لازم يولد مو زين
ايا بنت الذين وحنا من الصبح شنقول المهم سوينا اجراءات الدخول الساعه 9 دخلت الجناح
طبعا واعليا عليها لحد الحين ماولدت ذبحوها
تكفون ادعوا لها

وشرايكم بالخدمات الرهيبه اللي عندنا بالكويت
بدال مايسنعون الخدمات الطبيه عندنا فالحين
يتبرعون حق الهكره وغيرهم

حسبي الله ونعم الوكيل

عيدكم مبارك

كل عام والكويت بخير

عيدكم مبارك بلوجرز

وعساه عيد سعيد

لقيمات وملاحظتين

لقيمات*

سامحونا على الصور على السريع وفي المطبخ

المهم الوصفه

كوبين طحين ابيض-

ملعقه صغيره (حوس الشاي) بيكنج باودر-

ملعقتين صغيره (حوس الشاي) خميره-

ثلاث فناجين حليب الجمعية-

طبعا نخلطهم جميعا بماء دافي

ونعجنهم عدل عدل ونغطيهم وقبل الفطور

بشوي نسوي اللقيمات

وبالهناء والشفاء

--------------------------------

الملاحظة الأولى

الله يسامحهم اللي قطعوا الماي علينا انا قريت

بالجرايد عن القطع المبرمج بس قلت ماراح يحوشنا

حسبي الله ونعم الوكيل كل شيء ولا الماي

-----------------------------------

الملاحظة الثانيه

امس بعد الفطور تفاجانا بصبي الدوانية

يدخل علينا كرتون هيل وكرتون تمر

وخيشة قهوه عربية من النوع الممتاز

طبعا سألنا صبي ابوي من وين

من جابهم رد بالحرف ماما انا

مايعرف في نفر يجي جيب هدا أغراض

وجدام بيت بعد في ودي حق جيران

المهم ماعرفنا قنا يمكن ربع ابوي

اليوم عرفنا من!! طلع ابن احد الاعضاء السابقين

والذي ينوي ان يرشح نفسه الانتخابات القادمه

شفتوا المسخره لاوداز حق جيرانا بعد

والسبب ان ماشاء الله اخواني واخواتي 11

ونفس الشيء جيرانا فيضبطون نفسهم من الحين

الحمدلله والشكر يوزع تمر وقهوه وهيل

الله يهداه كان جابهم اول رمضان

بدال ماأروح اشتري

وسلامتكم

--------------------------------------------