لقيمات وملاحظتين
.2.jpg)
لقيمات*
سامحونا على الصور على السريع وفي المطبخ
المهم الوصفه
كوبين طحين ابيض-
ملعقه صغيره (حوس الشاي) بيكنج باودر-
ملعقتين صغيره (حوس الشاي) خميره-
ثلاث فناجين حليب الجمعية-
طبعا نخلطهم جميعا بماء دافي
ونعجنهم عدل عدل ونغطيهم وقبل الفطور
بشوي نسوي اللقيمات
وبالهناء والشفاء
--------------------------------
الملاحظة الأولى
الله يسامحهم اللي قطعوا الماي علينا انا قريت
بالجرايد عن القطع المبرمج بس قلت ماراح يحوشنا
حسبي الله ونعم الوكيل كل شيء ولا الماي
-----------------------------------
الملاحظة الثانيه
امس بعد الفطور تفاجانا بصبي الدوانية
يدخل علينا كرتون هيل وكرتون تمر
وخيشة قهوه عربية من النوع الممتاز
طبعا سألنا صبي ابوي من وين
من جابهم رد بالحرف ماما انا
مايعرف في نفر يجي جيب هدا أغراض
وجدام بيت بعد في ودي حق جيران
المهم ماعرفنا قنا يمكن ربع ابوي
اليوم عرفنا من!! طلع ابن احد الاعضاء السابقين
والذي ينوي ان يرشح نفسه الانتخابات القادمه
شفتوا المسخره لاوداز حق جيرانا بعد
والسبب ان ماشاء الله اخواني واخواتي 11
ونفس الشيء جيرانا فيضبطون نفسهم من الحين
الحمدلله والشكر يوزع تمر وقهوه وهيل
الله يهداه كان جابهم اول رمضان
بدال ماأروح اشتري
وسلامتكم
--------------------------------------------
posted by الفراشة @ ١١:١٥ م
29 comments
29 Comments:
شوفي فراشة
انا طفارتي اللقيمات
عمري وبحيااتي المطبخيه
ما اضبطت معاي
لاهي اللي تطلع مدورة
ولا تطلع معاي مقرمشة على قولتهم
بموووت بسويهم
مووو رااااااضي
لا بالقفشة ولا بيدي
بس لا يأس مع الحياة ان شاء الله
ولا حياة مع اليأس
بجرب طريقتج
وبخصوص التمر والقهوة عادي يبه
اخذوهم كهدية
واكسروا فيهم بيوم الإنتخابات
:P
هلا والله بنون النسوه
يووه عاد انا تخصصي اللقيمات
وحلى شيء تصبين بالايد تصطلع
مضبوطه عدل
وعلى التمر افا عليج
بنحطهم للدوانية وبالانتخابات
انا اول وحده بكسر فيهم
باطين كبدي من الانتخابات السابقه
اموت على القهوة العربيه...;D
والله صاجه جان يابهم من اول رمضان والله متفرغ حددده هههه
برنسس
هلا والله ضحكة العافيه لج قولي آمين
اي الله يهداه تأخر حيل
كويتية
وانا غرامي القهوه العربيه
شسويله توه يتذكر انه بينزل
قال اجيبها قبل العيد
لندني
ههههههههههههههههههههه
والله ضحكتني اي والله من زين الهدية
لا ومصدق عمره والله مايشم اصواتنا
المشكله ابوه مسوي معانا موقف بايخ
الانتخابات اللي طافت يعني حامض على بوزه
اما اللقيمات الماي يكون دافي
يعني تقريبا كوب ماي الا شوي
المهم ماتصير خفيفه لازم تكون متماسكه شوي
اما الزيت طبعا تحط كميه يعني نص
الجدر او المقلاه اللي بتستخدمها
بس اذا مقلاه لازم تكون عميقه
اما الشيره كوبين سكر وكوب ماي
نحطهم على النار مع شوية زعفران وهيل
وعلى نار هاديه ننطره لين يغلي
راح تطلع فوق طبقه بيضاء
هذه نشيلها ونعصر شويه ليمون
عشان تتماسك الشيره وماتتكتل
وبالهناء والشفاء
وحاضرين للطيبين
تسلم ايدج على اللقيمات الطيبه :>
وعليكم بالعافيه
وضحكتني على العضو حدده تو الناس
نسكافيه
الله يعافيج ياقلبي
وعلى الاخ اللي بيرشح نفسه
يضبط نفسه من الحين
اييه انا بعد سمعت ان في واحد من اللي مرشح نفسه عازم الحريم على غبقه
ايييه اكيد حق السنه اليايه
يزهبون الدوات قبل الفلعه
المهم .. انا عمري ما عرفت اشلون يسوون القيمات
ما ادري شلون يدورونها جذي
الله يااا حلو قيمات امي .. احلى قيمات ذكتها
سمايل
هههههههههههههه
اي والله يزهبون الدوا قبل الفلعه
واللقيمات الله انا غرامي اسويها
حياج سمايل
اشوه عرفتوا منو يايب الاغراض
احنا مره بالديوانيه وصلنا ديلفري عشا لما كليناه طلع مال الديوانيه اللي يمنا هاهاها
اللقيمات شكلها لذيذ بالعافيه
fuzzy
هههههههههههههههههههههههه
ههههههههههههههههههههههههه
ضحكتني الله يجزاك خير
كليتوا ولاسألتواههههههههههه
الله يعافيك
وااو تشوق الصور وتيوع :)
بنفس الوقت تسلم ايدج :)
ajmalaljmela
الله يسلمج ياقلبي
تسلمين على المرور
بدع إبن هالعضو السابق
اشكره عاد جذي؟
الترشيح للإنتخابات صار بالوراثه الظاهر
وشكراً على وصفة اللقيمات اللذيذه اللي ياما تلفت صحتنا ورفعت سكرنا وتفخت كروشنا
:)
حسام
هههههههههههههههههههه
اي والله تنفخ وترفع السكر
اما ابن العضو والله مايشم
ريحة اصواتنا
مابقى الا هالاشكال اعطيها صوتي
شكلها خوش لقيمات وحتى الطريقة جنها سهلة، إنشاء الله راح أجربها وأقول لج النتيجة، وصاجة على طارى افنتخابات اول من بارك بالشهر معيوف وجمال العمر طبعاً حطوا يافطات في كل المناطق حسب الخمس دوائر يعنى ورانا ورانا ، الله يعينا
يعطيج العافيه على هالقيمات الحلوه:))
عاد انا اموت على القيمات خاصه مالت المخبز الدنماركى حلوه مالتهم
العين الساهره
هلا والله جربيها سهله حيل
وكل من جربها ترك اي طريقه ثانيه
اما هذول الله يعينا عليهم في الانتخابات
الجايه
كووويتية
حياج في المدونه
والله يعافيج ياقلبي
شايني شل
هلا والله الغاليه
الله يسلمج ياقلبي
اما على الموقف الله المستعان
نعيش ونشوف
يعني بقتنع فيه وراح انتخبه
اذا عطاني هييييييل!!!!
ياربي ليش الأوادم جذي؟؟؟؟
اشلونج انتي شخبارج؟
سالفة قلب
هلا والله بالغاليه
اخباري تمام التمام
فيه اوادم هذا حد تفكيرهم
وعلى بالهم الناس كلهم مثلهم
يبيـــــــــــله
كيتي
ههههههههههههههههههههههههههه
وهذا حالي كل يوم
يسحبون الدله مني ومستمره
شايفه المسخره وصلنا لمرحله رشوه
بهيل وقهوه وتمر رشوة على قد حاله
تقبل الله طاعتج
وعيدج مبارك
هلا والله
كيتي ونسكافيه
عساكم من عواده ياقلبي
تسلمون على المرور
تقبل الله طاعتج فراشه
وعساج من عواده حبيبتي
مشكورة على المعايده
سالفة قلب
هلا والله
تسلمين ياقلبي
وكل عام وانتي بخير
تسلم ايدينج الفراشه عل اللقيمات الحلوه.
يم يم عجيبه
إرسال تعليق
<< Home